क्यारीका दुई नयाँ विद्युतीय भ्यान नेपाली बजारमा सार्वजनिक

काठमाडौं, २२ साउन । काठमाडौंको भृकुटीमण्डपमा सुरु भएको नाइमा मोबिलिटी एक्स्पो २०८२ मा लक्ष्मी ग्रुपअन्तर्गतको एलएक्सजी मोटर्स प्रालिले चीनको प्रख्यात विद्युतीय सवारी साधन ब्रान्ड क्यारीलाई नेपाली बजारमा सार्वजनिक गरेको छ । एक्स्पोको पहिलो दिन कम्पनीले क्यारीका दुई नयाँ विद्युतीय भ्यान केभान १ र केभान २ नेपाली बजारमा ल्याएको घोषणा गरेको हो ।
यी भ्यानहरू व्यावसायिक यात्रु सेवा र शैक्षिक संस्थाहरूको विद्यार्थी यातायातका लागि उपयोगी हुने विश्वास कम्पनीले व्यक्त गरेको छ । कम्पनीले केभान १ को मूल्य ५८ लाख ५६ हजार र केभान २ को मूल्य ६३ लाख ६ हजार रुपैयाँ निर्धारण गरेको छ ।
यी विद्युतीय भ्यानहरू नेपालकै लागि भनेर विशेष रूपमै डिजाइन गरिएको र १५ तथा १६ सिट क्षमतामा उपलब्ध हुने जानकारी दिइएको छ । व्यावसायिक प्रयोजनका लागि आधुनिक खैरो रङमा कमर्सियल भेरियन्ट र स्कुल तथा कलेज प्रयोजनका लागि सुरक्षा प्राथमिकतासहित पहेँलो रङमा स्कुल भेरियन्ट उपलब्ध रहेको छ । स्कुल भेरियन्टमा बालबालिकाको सुरक्षालाई विशेष ध्यान दिँदै उच्च सुरक्षात्मक विशेषताहरू समावेश गरिएको कम्पनीले जनाएको छ
दुबै भ्यानमा ५३ किलोवाट आवर क्षमताको एलएफपी सिएटिएल ब्याट्री जडान गरिएको छ जसले एक पटक पूर्ण चार्जमा तीन सय किलोमिटरभन्दा बढी दूरी तय गर्न सक्ने दाबी गरिएको छ
यसमा स्थायी चुम्बकीय समकालीन मोटर प्रयोग गरिएको छ जसले एक सय तीस र दुई सय सत्तरी एनएमको रेटेड र पिक टर्क तथा पचास र अस्सी किलोवाटको रेटेड र पिक पावर प्रदान गर्छ । नेपाली सडकका लागि उपयुक्त हुनेगरी यी भ्यानमा एक सय असी मिलिमिटरको भुइँचो दूरी राखिएको छ ।
सुरक्षाका लागि अगाडि डिस्क र पछाडि ड्रम ब्रेकका साथै एबीएस र ईबीडी प्रणाली जडान गरिएको छ । अत्यावश्यक समयमा प्रयोग गर्न सकिने आगो निभाउने यन्त्र पनि भ्यानभित्र राखिएको छ ।
एलएक्सजी मोटर्सका बिक्री तथा बिक्रीपछिका सेवा विभाग प्रमुख सञ्जय खड्काले क्यारीको सुरुवातले हरित नेपालको दिशातर्फ उल्लेखनीय योगदान पुर्‍याउने विश्वास व्यक्त गरे ।
उनका अनुसार यी गाडीहरू परम्परागत इन्धन सवारी साधनको तुलनामा बढी भरपर्दो खर्च घटाउने र वातावरणमैत्री हुने भएकाले दीर्घकालीन रूपमा उपयोगी हुनेछन् ।
उनले स्कुलका विद्यार्थीहरूको सुरक्षित ढुवानीका लागि पनि क्यारी ईभी उत्तिकै विश्वसनीय हुने बताए ।
कम्पनीले क्यारीका यी विद्युतीय भ्यानबारे थप जानकारी लिन इच्छुक ग्राहकहरूलाई नाइमा मोबिलिटी एक्स्पोको हल डी स्थित स्टल डी–१२ मा अवलोकन गर्न अनुरोध गरेको छ ।
एलएक्सजी मोटर्स प्रालि लक्ष्मी ग्रुपको सहायक कम्पनी हो जसले विद्युतीय सवारी साधनमार्फत दिगो यातायातको विकासमा योगदान पुर्याउने उद्देश्य लिएको छ ।